БАРГУЗОРИИ РӮЗҲОИ ФАРҲАНГИ ҶУМҲУРИИ ИСЛОМИИ ЭРОН ДАР ҶУМҲУРИИ ТОҶИКИСТОН

Аз 30 октябр то 6 ноябри соли 2022 дар Ҷумҳурии Тоҷикистон Рӯзҳои фарҳанги Ҷумҳурии Исломии Эрон баргузор мегардад.

Ҳайати расмии рӯзҳоро Вазири фарҳанг ва иршоди исломии Ҷумҳурии Исломии Эрон Муҳаммадмеҳдӣ Исмоилӣ роҳбарӣ намуда, шумораи умумии иштирокчиён зиёда аз 60 нафарро ташкил медиҳанд.

Дар назар аст, дар доираи баргузории рӯзҳо вохӯрии Вазири фарҳанг ва иршоди исломии Ҷумҳурии Исломии Эрон бо Вазири фарҳанги Ҷумҳурии Тоҷикистон ва намояндаи Ҳукумати Ҷумҳурии Тоҷикистон дар Китобхонаи миллии Тоҷикистон баргузор гардад.

Ифтитоҳи расмии рӯзҳо дар Театри давлатии академии опера ва балети Тоҷикистон ба номи С. Айнӣ доир гардида, намоиши ҳунарҳои мардумии ин сарзамин дар Осорхонаи миллии Тоҷикистон баргузор мешавад.

Ҳамзамон, маҳфили “Шоҳномахонӣ” ва гурӯҳи мусиқии “Пож” ва “Сурӯши Мавлоно” дар Донишгоҳи миллии Тоҷикистон ва Донишгоҳи омӯзгории Тоҷикистон ба номи С.Айнӣ, намоиши филмҳои эронӣ дар Кохи Наврӯз ва кинотеатри Ватан, маҳфили адабӣ бо иштироки шоирони Эрону Тоҷикистон ва гурӯҳи ҳунарии “Варзишгарони зӯрхонаӣ” дар толори Иттифоқи нависандагони Тоҷикистон баргузор мегарданд.

Рӯзҳои 3 ва 4 ноябр ҳайати меҳмонон дар шаҳрҳои Хуҷанд, Бохтар ва Кулоб рӯзҳои фарҳангиро идома медиҳанд. Ҳайати меҳмонон аз Осорхонаи миллии Тоҷикистон, Кохи Наврӯз, Маҷмааи “Истиқлол” ва Муассисаи давлатии ҷумҳуриявии "Мамнӯъгоҳи таърихию фарҳангии Ҳисор" низ дидан менамоянд.

Аз ҷараёни баргузории рӯзҳо дар гузоришҳои оянда маълумоти муфассал пешниҳод мегардад.

Марям Холиқзода
Маркази матбуоти Вазорати фарҳанг