Сомонаи пешина | Пш, 17 Октябр 2019 | 16:10
ТОҶ :: РУС :: ENG

«Фарҳанг ҷавҳари ҳастии миллат аст»

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам
Эмомалӣ Раҳмон

Ҳифзи ёдгориҳои таърихию фарҳангӣ ҳамчун мероси гаронбаҳои миллию умумибашарӣ- вазифаи инсонӣ ва шаҳрвандии ҳар яки мост. Биёед ин ганҷи пурқиматро чун гавҳараки чашм ҳифзу эҳё намоем, ба наслҳои оянда мерос гузошта, дар барқароркунии онҳо саҳми босазо гузорем.

Театри нави дўстии халқҳо дар Москва бо намоиши асари драмнависи тоҷик ифтитоҳ гардид.

Дар шаҳри Москва дар Маркази минтақавии дастгирии ташаббусҳои ҷамъиятӣ ва стратегии Россия ва Қирғизистон Театри драмавии «Аён» бо тантана ифтитоҳ ёфт ва аввалин намоише, ки он ба тамошобинони худ пешкаш кард, асари драмнависи тоҷик Ҷумъа Қуддус «Шоҳ-бозӣ» - «Нубуввати охирин» буд.

Намоиш мавзуъи умумиинсониро дар бар гирифта, инсонҳоро ба сулҳ, ваҳдату ягонагӣ даъват менамояд ва нишон медиҳад, ки сӯиистифода кардани шиорҳои зоҳиран нек инсониятро ба ҳалокат мерасонад.

Намоиш аз ҷониби коргардон, ҳунарпеша ва рассоми машҳури қирғиз Садир Сагинбаев таҳия гардида, дар он нақшҳоро ҷавонони соҳибистеъдоди қирғиз бозидаанд. Асосгузор ва директори театри нави «Аён», ки онро ғайрирасмӣ театри муҳоҷирон меноманд, шоира Айнаш Козубоева мебошад. 

Садир Сагинбаев мегӯяд, ки соли 2006 Театри тамошобини ҷавони қирғиз барои ширкат дар фестивали байналмилалии санъати театрӣ дар шаҳри Иссиқкўл асари Ҷумъа Қуддус «Шоҳ-бозӣ»-ро таҳия карда, соҳиби Шоҳҷоиза гардид. Инчунин, ба чанд ҷоизаи дигар, аз ҷумла, барои иҷрои нақшҳои беҳтарини зан ва мард сазовор гашт, ба худи Садир Сагинбаев ҷоиза барои ороиши рассомии беҳтарин супорида шуд. Инак ӯ ният карда буд, ки дар Москва асари мазкурро бо диди нав таҳия созад. «Аён» - театри дўстии халқҳост, ки дар Москва чун минбари халқхо хеле зарурат дорад. 

Ҷумъа Қуддус муаллифи беш аз сад драма, се романи таърихӣ, шаш повест ва даҳҳо ҳикоя буда, пйесаҳои ў дар аксари театрҳои Тоҷикистон, инчунин, дар Қирғизистон ва Қазоқистон таҳия шудаанд. Ин таҳияи панҷуми асари Ҷумъа Қуддус «Нубуввати охирин» аст: бори аввал вай бо номи «Нубуввати охирин» дар Театри акаемӣ-драмавии ба номи Лоҳутӣ, сипас дар нахустин ҷашнвора-озмуни «Андалеб» аз ҷониби театри мардумии Бохтар иҷро ва сазовори Шоҳҷоиза шуд, дар Сурия ба забони арабӣ тарҷума ва нашр гашт, соли 2006 дар таҳияи Театри тамошобини ҷавони Бишкек (бо номи «Шоҳ-бозӣ») соҳиби Шоҳҷоизаи ҷашнвораи байналмилалии театрӣ шуд, сипас дар театри драмавии шаҳри Ўши Қирғизистон таҳия гардид. Барои ин дастовард ба Ҷумъа Қуддус соли 2017 унвони ифтихории Академики санъати театрии Қирғизистон дода шудааст. 

Екатерина Ивашенко, театршинос,
Моҳрухсор Ҳаким, рўзноманигор,
Шаҳри Москва.